Ҫурла уйӑхӗн 8-мӗшӗнче Етӗрне округӗнчи Совхозный поселокӗнче Чӑваш Ен Кубокне ҫӗнсе илессишӗн лаша чупӑвӗ иртӗ. Ӑна йӗркелекенӗ — «Етӗрнесӗт» организаци.
Кӑҫал В.И.Чапаев ячӗллӗ Чӑваш лаша савучӗ уҫӑлнӑранпа 100 ҫул ҫитет. Ҫавна май чупу питӗ интереслӗ пуласса шантараҫҫӗ. Спортӑн ҫак тӗсне юратакансене хапӑлласа кӗтеҫҫӗ. Унта тӳлевсӗрех кӗртеҫҫӗ.
Ку кӑна мар. Унта ҫемьепе канма, юрӑ-кӗвӗпе киленме пулать. Пурне те 14 сехетренпе кӗтеҫҫӗ.
Аса илтерер: нумаях пулмасть унта ЧР Элтеперӗн Пысӑк кубокне ҫӗнсе илессшӗн лаша чупӑвӗ иртнӗ.
Етӗрне округӗнче Сергач кӳллинче пулӑ нумай вилнине асӑрханӑ. Мӗн пулнӑ унта? Халӗ прокуратура тӗрӗслев ирттерет.
Пулӑ Сӑр юханшывӗнче Сергач кӳлли патӗнче нумай вилнӗ. Вырӑна тӳрех район прокурорӗ, администраци пуҫлӑхӗ тата полици органӗсем ҫитнӗ. Лаборатори анализӗ тума шыв тӗслӗхне тата вилнӗ пулла илнӗ. Тишкернӗ хыҫҫӑн пулӑ мӗншӗн вилни паллӑ пулӗ.
Аса илтерер: Комсомольски округӗнче такам икӗ юман касни пирки хыпарланӑччӗ. Халӗ ку ӗҫе кам тунине шыраҫҫӗ.
Пӗрле пурӑннӑ хӗрарӑма хӗнесе вӗлернӗ те кайран виллине ейӳ шывӗпе тулнӑ тӗп сакайне пенӗ. Кун пек тискер тӗслӗх Етӗрне округӗнчи Кӑмаккасси ялӗнче пулнӑ.
Куншӑн 64 ҫулти арҫыннӑн уйрӑм режимлӑ колонире 8 ҫул ларма тивӗ. Суд тата следстви ҫирӗплетнӗ тӑрӑх, ака уйӑхӗн 5-мӗшӗнче арҫын ӳсӗр пулнӑ. Пӗрле пурӑннӑ хӗрарӑмпа хирӗҫсе кайсан ӑна 30 хутран кая мар ҫапнӑ. Лешӗ кӑштахран вилнӗ.
Кун хыҫҫӑн арҫын хӗрарӑм виллине тӗп сакайне пенӗ. Унта вара ейӳ шывӗ пулнӑ. Ҫапла вӑл хӗрарӑм сарӑмсӑр вилнӗ пек туса яваплӑхран тарма хӑтланнӑ.
Палӑртмалла: арҫын унччен те ҫакнашкал преступленишӗн явап тытнӑ.
Етӗрне округӗнчи Пупӑлькасси ялӗнче пурӑнакан Зоя Леонтьева 95 ҫулхи юбилейне паллӑ тунӑ. Вӑл – тыл ӗҫченӗ, вӑрҫӑ ачи.
Зоя Алексеевна колхозниксен ҫемйинче ҫуралнӑ, ҫӑкӑр хакне мӗн ачана пӗлнӗ. Тӑватӑ класс вӗренсен текех шкула каяйман вӑл – кӗҫӗннисене, шӑллӗсене, пӑхма тивнӗ. Ашшӗ фронта кайнӑ, аслӑ хӗрӗн амӑшне пулӑшмалла пулнӑ.
Ӗмӗр тӑршшӗпех вӑл «Прогресс» колхозра ӗҫленӗ, кайран «Выльский» совхозра та вӑй хунӑ. Ытларах вӑл хӑмла туса илессипе ӗҫленӗ. Ӑна «Тӑван ҫӗршывӑн Аслӑ вӑрҫи вӑхӑтӗнче хастар ӗҫленӗшӗн» медальпе чысланӑ.
Мускаври ушкӑн Чӑваш Енре салтак ӑсатни ҫинчен документлӑ фильм ӳкерет. Вӗсем Етӗрне округне ҫитнӗ.
Ӳкерӳ Тури Ачак ялӗнчи этнографи комплексӗнче иртет. Режиссер – Василий Климов, операторсем – Вячеслав Калмыков тата Иван Беляев. Вӗсене Республикӑри халӑх пултарулӑхӗн центрӗ тата Чӑваш патшалӑх гуманитари ӑслӑлӑхӗсен институчӗн специалисчӗсем пулӑшаҫҫӗ.
Фильм Раҫҫей халӑхӗсен этнокультура еткерлӗхне упраса хӑварас енӗпе ӗҫлекен Пӗтӗм Раҫҫей проекчӗн пайӗ пулса тӑрӗ. Проекта В.Д. Поленов ячӗллӗ Патшалӑх Раҫҫей халӑх пултарулӑхӗн ҫурчӗ йӗркеленӗ.
Сӑмах май, кун пек фильмсене ытти регионта та ӳкереҫҫӗ. Кинокартинӑра салтака ӑсатас йӑла-йӗркене ҫеҫ мар, халӑх вӑййисене те, арҫын ачасене воспитани памалли меслетсене те кӗртӗҫ.
Етӗрне округӗнче Патшалӑх автоинспекцийӗн ӗҫченӗсем ҫул ҫине скутерпа тухнӑ водителе тытса чарнӑ. Унӑн права та пулман.
Ку «Никольски — Етӗрне — Нурӑс» ҫул ҫинче пулнӑ. Унта Патшалӑх автоинспекцийӗн ӗҫченӗсем мототранспорта асӑрханӑ. Руль умӗнче ларнӑ арҫыннӑн водитель прави пулманни те тӑрӑ шыв ҫине тухнӑ.
Инспекторсем нумай калаҫса тӑман – йӗркене пӑснӑ арҫын тӗлӗшпе административлӑ материал ҫырнӑ. Халӗ унӑн куншӑн 5 пин тенкӗрен пуҫласа 15 пин тенкӗ таран штраф тӳлеме тивӗ.
Патшалӑх автоинспекцийӗ аса илтерет: водитель прави ахаль кӑна пластик карточка мар. Вӑл – ҫын вӗреннине, экзаменсем тытнине, ҫул-йӗр правилисене пӗлнине кӑтартакан документ.
Чӑваш Енре ӳстернӗ 24 пине яхӑн тӗм салата виҫӗ региона ӑсатнӑ. Пирӗн патра ӳснӗ ешӗл ҫимӗҫе Чулхула облаҫӗнче, Тутар Республикинче тата Самар облаҫӗнче пурӑнакансем тутанса курӗҫ.
Тӗрӗслев органӗн ӗҫченӗсем салата тӗрӗслеме илнӗ, лаборатори тесчӗсем тунӑ. Анализсем чӑваш салатӗнче сиенлӗ япаласем ҫуккине палӑртнӑ.
Сӑмах май, салата Етӗрне округӗнче ятарлӑ теплицӑра ӳстереҫҫӗ.
Етӗрне районӗнчи Совхознӑй поселокра агророк фестиваль иртӗ. Ӑна йӗркелекенни — Етӗрнери сӗт завочӗ. Мероприяти унти лаша заводӗнче иртӗ.
«Виҫӗ ангар — виҫӗ сцена — 8 сехет хушши татти-сыпписӗр рок янӑрӗ». Ҫапларах анонсласа ҫырнӑ ку хыпар пирки.
Программӑра Чӑваш Енри юратнӑ тата паллӑ ушкӑнсем, урӑх регионсенчи музыкантсем, «КОНЕЦ ФИЛЬМА», «ПИЛОТ», «7000$», «КУВАЛДА», «CASUAL», «БАХЫТ-КОМПОТ», «ВОЗДУХ», «БЕZ Б» ушкӑнсем.
Фестиваль программипе rockzerno.ru сайтра тӗплӗнрех паллашма пулать. Концерт 14 сехетре пуҫланӗ. Унта тӳлевсӗр кӗртӗҫ.
Ыран, ҫу уйӑхӗн 16-мӗшӗнче, Етӗрне тӑрӑхӗнче халӑхсен хушшинчи джаз фестивалӗ иртет. Унта 18 ҫултан аслӑрах ҫынсем ҫитсе курма пултараҫҫӗ.
Мероприяти Совхозный поселокӗнчи лаша заводӗнче уҫӑ тӳпе айӗнче иртӗ. Ҫывӑхрах, Сӑр юханшывӗ хӗрринче, улмуҫҫисем чечеке ларнӑ, таврара чӗрӗ юрӑ-кӗвӗ янӑрӗ…
Сцена ҫине тӗрлӗ ҫӗршыври мусӑкҫӑсем тухӗҫ: Австралири Дэн Барнет, Кубӑри Juan Orlando Band ушкӑн, ҫавӑн пекех Mr. Melvin. Раҫҫейрен вара Сергей Долженков тата MarshiMellow Orchestra квинтечӗ пулӗ.
Мероприятире ҫавӑн пекех ӗҫме дегустацийӗ, ӑсталӑх класӗсем пулӗҫ. Ачасем валли вылямалли лапамсем те уйӑрса парӗҫ.
Фестиваль 14 сехетре пуҫланать.
Етӗрне округӗнче пӗртен-пӗр вӑрҫӑ ветеранне Алексей Темнова Ҫӗнтерӳ кунӗпе саламланӑ.
Алексей Федорович Пӑрачкав районӗнче ҫуралнӑ, 17 ҫулта чухне ӑна Тӑван ҫӗршывӑн Аслӑ вӑрҫине кайма повестка панӑ.
Вӑл Беларуҫе тата Варшавӑна ирӗкрен кӑларнӑ ҫӗре хутшӑннӑ. Ҫапӑҫусенче пӗрре мар аманнӑ. Ҫӗнтерӗве вара Берлин ҫывӑхӗнче кӗтсе илнӗ.
Алексей Федорович Мухтав, Хӗрлӗ Ҫӑлтӑр орденӗсене тата тӗрлӗ медале тивӗҫнӗ. Вӑрҫӑ хыҫҫӑн вӑл Етӗрне районӗнче лаша заводӗнче вӑй хума пуҫланӑ, «Сурские зори» турбазӑна та ертсе пынӑ.
Палӑртса хӑварар: кӑҫал ҫурла уйӑхӗнче ветеран 100 ҫул тултарӗ.
+0.3 °C